И.Я.Яковлев – халăх чĕринче

21.04.2023

Автор: Ешмейкина Л.А.

   Ака уйăхĕн 21-мĕшĕнче Хĕрлĕ Чутай вăтам шкулĕнче Чăваш чĕлхи кунне тата И.Я.Яковлев çуралнăранпа 175 çул çитнине  халалланă  «И.Я.Яковлев – халăх чĕринче»  муниципалитет шайĕнче ăслăлăхпапа практика конференцийĕ иртрĕ.

  Чи малтанах конференцие пухăннă вĕренекенсене, вĕрентекенсене, хăнасене Хĕрлĕ Чутай шкул директор ĕçĕсене туса пыракан В.Н.Архипова тата Хĕрлĕ Чутай муниципалитет округ администрацийĕн вĕренÿ пайĕн пуçлăхĕ И.Н.Живоев саламларĕç.

     Унтан Чăваш Республикин культурăн тава тивĕçлĕ ĕçченĕ, «Чавал» ентешлĕхĕн пуçлăхĕ В.Н.Савинкин сăмах илчĕ. Вăл республика шайĕнче «Манăн юратнă вĕрентекен» сочинени çырса мала тухнă вĕренекенсене парнесемпе дипломсем парса хавхалантарчĕ. Палăртма кăмăллă, пирĕн шкулта 5-мĕш класра вĕренекен П.Канцелярова çак конкурса хутшăнса 2-мĕш вырăн çĕнсе илме пултарчĕ. Вăл сочиненире хăйĕн пĕрремĕш вĕрентекенĕ, Кочеганова Т.Г., çинчен çырнă.

   Конференцин иккĕмĕш пайĕ ĕçлĕ самантпа тулчĕ. Ачасем тĕрлĕ секцисене хутшăнса хăйсен пултарулăхĕпе паллаштарчĕç. Кузьмина А. «Тăван халăха халалланă пурнăç» тĕпчев ĕçĕсен хÿтĕлевĕн секцинче «И.Я.Яковлев пурнăçĕ П.Сизов куçĕпе» ĕçе тивĕçлĕ хÿтĕлесе 2-мĕш вырăн йышăнма пултарчĕ. И.Я.Яковлев клавĕсем тăрăх тунă буктрейлерсен конкурсĕнче Майорова Н. 1-мĕш вырăн, «И.Я.Яковлевăн чун еткерĕ» сюжет ÿкерчĕкĕсен  ăмăртăвĕнче Глухов Д. 3-мĕш вырăн йышăнма пултарчĕç.

    Маттур вĕренекенсемпе савăнатпăр, мухтанатпăр, мăнаçланатпăр. Малашне те ăнăçу сунатпăр.